මුහුණේ කුරුලෑ සහ ඉන්නන් ඉන්නේ ඇයි?
බරපතල අසනීපයක් නොවුණත් කුරුලෑ අප කාටත් පාහේ, වැඩි කොටම තරුණ තරුණියන්ට සිත් අසහනය ඇති තරවන්නකි. හිතට වදයක් පමණක් නොවෙයි කුරුලෑ ඉවත්කොට සිනිඳු සමක් පවත්වාගෙන යාම සඳහා සමහරවිට වියපැහැදම් කිරීමටත් අපට සිදුවේ. ඇතැම් විට එකක් යන්නත් කලින් තව එකක් මුහුණ පුරා එන මේ කුරුලෑ කියන්නේ මොනවාද? ඉන් මිදෙන්න මගක් නැද්ද? අපි සොයා බලමු.
අප බොහෝ දෙනෙකු නොදැන සිටියාට, අපේ සිරුරේ සෑම කොටසක්ම පාහේ රෝම කූපයන්ගෙන් වැසී පවතිනවා. ඉන් බොහොමයක්ම රෝම කොපමණ සියුම් ද කිව්වොත් පියවි ඇසින් දැක බලා ගැනීමට නොහැකිය. රෝම වැඩෙන්නේ සමේ තිබෙන ඉතා කුඩා සිදුරු තුළයි. ඒවාට කියන්නේ කූප නැතිනම් රෝම කූප කියලසි. මේ කූප තුළ ග‍්‍රන්ථීත් අඩංගුවෙනවා. ස්නෙහමය ^ sebaceous& ග‍්‍රන්ථි යනුවෙන් හැඳින්වන මේවායින් නිපදවෙන තෙල් සම මෘදුව, සුනම්‍යව තබා ගැනීමට මෙන්ම සම වියළි ස්වභාවයට පත් කිරීම වැළැක්වීමට උදව්වේ. ඒත් සමහර වෙලාවලාවලට ස්නෙහමය ග‍්‍රන්ථි උවමනාවට වඩා තෙල් නිපදවයි. ඉතින් ඒ අතිරේක තෙල් කූපය තුළම හිරවී රැඳෙයි. අන්න ඒ අවස්ථාවේ දී, (නිරතුරුවම ශරීරයෙහි රැඳී සිටින) බැක්ටීරියා මගින් අවෘත කූපය ආසාදනයට ලක්කරනු ලැබේ. අපේ සිරුර ආසාදනයට එරෙහිව සටන් කරද්දී, එම ස්ථානය රතුවීමට, ඉඳිමීමට පටන් ගන්නවා පමණක් නොවෙයි සැරව ද පිරේ. එසේ රතුවී, ඉදිමී, සැරව පිරුණු ස්ථානය තමයි කුරුලෑවක් වශයෙන් හඳුනවන්නේ. බොහෝ විට බොහෝ දෙනා කරන්නා වාගේ කුරුලෑව ‘පොඩි කිරීම‘, මිරිකීම හේතු කොටගෙන සුළු ආසාදනය අවට පටක වලටත් පැතිරී ප‍්‍රශ්නය තවත් බර පතලවේ. එසේ සරල කුරුලෑව ‘වණයක්‘ බවට පත් කරගත් විට, එය සුවවීමට සති ගණන් ගතවෙනවා පමණක් නොව එය සුවවූ පසුවත් සමේ කැළලක් ඉතිරිවේ.
සාමාන්‍යයෙන් ළමයින් (විශේෂයෙන් පිරිමි ළමුන්) ගැටවරවියට එළඹෙද්දී තමයි ඔය කුරුලෑ කරදරයට මුහුණ දෙන්නේ. ඒ වයස් කාලයේ දී කුරුලෑ මතුවීමට හේතුව ළමුන් ලිංගික පරිණතභාවයට ළඟා වෙද්දි හෝමෝන ක‍්‍රියාකරිත්වය ඉහළ යාමයි. (විවිධ ශාරීරික ක‍්‍රියාදාමයන් පාලනය කරන ග‍්‍රන්ථි මගින් නිපදවනු ලබන රසායන තමයි හෝමෝන ලෙස හඳුන්වන්නේ) මේ ඇතැම් හෝමෝන සමේ තෙල් නිෂ්පාදනය වැඩිකරයි.
කිසියම් පුද්ගලයෙකුට බොහෝ කාලයක් මුළුල්ලේ බහුලව කුරුලෑ පවතින විට ඒ තත්ත්වයට කියන්නේ ඇක්නිය හෙවත් අණිය කියලයි. ඇක්නිය මගහරවා ගැනීම සඳහා කළ හැකි හොඳම දෙය දවසකට දෙවතාවක්වත් සබන් ගා සෝදා හරිමින් සම පිරිසිදුව තබාගැනීමයි. තත්ත්වය තවත් උග‍්‍රවෙනවා නම් සමේ රෝගවලට ප‍්‍රතිකාර කරන වෛද්‍යවරයෙකුට තමයි උදව් කල හැකිවෙන්නේ.
කොහොමවුණත් මතක තබා ගතයුතු දෙය වන්නේ මෙයයි: ඇක්නිය අස්වාභාවික දෙයක් නොවේය, එය සදහටම පවතින්නක් නොවේය, එය පහසුවෙන් පෙනෙනසුළු වගක් දැනෙන්නේ අනෙක් අයට වඩා ඔබටමය යන්නයි.
ඉන්නන් සෑදෙන්නේ කොහොමද?
කුරුලෑ සෑදෙන්නේ බැක්ටීරියාවල ක‍්‍රියාකාරිත්වයෙන් වුණත් සමේ රෝගයක්ම වන ඉන්නන් සෑදීමට මුල්වන්නේ වෛරසයි. එක්තරා වෛරස විශෙෂයක් (මේවා මානව පැපිලෝමව හෙවත් Human Papilloma යනුවෙන් හැඳින්වෙන වෛරස පවුළට අයත්) සමේ සෙල ආක‍්‍රමණය කිරීමෙන් එම සෛල සාමාන්‍ය වේගයට වැඩි වේගයකින් ප‍්‍රජනනය කිරිමට සලස්වයි. එහි ප‍්‍රතිඵලයක් ලෙස සමෙහි තද නෙරුමක් නැතිනම් ගැටයක් නිර්මාණයවේ. ස්පර්ශයෙන් සහ ඉන්නන්ගෙන් ඉවත හැලෙන සම හා ගෑවීමෙන් ඉන්නන් බෝවිය හැකි නමුත් එවා සෑදීමට ඉවහල්වන වෛරසයට බොහෝදෙනා ප‍්‍රතිරෝධ දක්වන හෙයින් ගෑවුණු සියල්ලන්ටම එය බෝවෙන්නේ ද නැත. ඉන්නන් දැකුමට ප‍්‍රිය දෙයක් නොවූවත් ඒවා සිරුරට හානිකර ද නොවේ. සාමාන්‍යයෙන් මාස කිහිපයකින් ඉබේටම ඒවා පහවී යයි.
HANDY ANSWER BOOK for KIDS (and Parents)
by Visible Ink Press (2010) නමැති පොත අසුරෙනි
සකස් කළේ සරත් කැල්ලපොත
One Response to “මුහුණේ කුරුලෑ සහ ඉන්නන් ඉන්නේ ඇයි?”
සිංහලෙන් මෙවැනි වෙබ් අඩවියක් ආරම්භ කිරීම බොහෝ දෙනෙකුට ප්‍රෙයා්ජනවත්. එමෙන්ම සිංහලෙන් ලියන ලේඛකයන්ගේ ලිපි මෙම වෙබ් අඩවියෙහි පලකිරීමට අවස්ථාවක් ලබාදුන්නොත් (පරිවර්තන නොවේ) එය ද මහගු කාර්යයක් වේවි. ස්තූතියි.