සැමට විදු නැන නුවණ – Science Literacy for All

කළු කුහර වටා තිබෙන මරණයේ පවුරු බිඳ දැමිය හැකියි

භෞතික විද්‍යාඥයන් බොහෝ කාලයක් තිස්සේ කියා සිටින්නේ කළු කුහර යනු ඇතුළට යා නොහැකි හිස් තැන් බවයි. ඒ තුළට යන කිසිම දෙයක් ආපසු පැමිණීමක් නැත. කළු කුහර අධ්‍යයනය කිරීමට කොහෙත්ම නොහැකිය; හෝ අර්ථවත් ආකාරයකට වටහා ගැනීමට හැකියාවක් නැත. ‘ගෝකින් විකිරණය’ (Hawking radiation) ස්වරූපයෙන් ඇතැම් පදාර්ථ හා ශක්තිය ස්වල්ප ප්‍රමාණයක් ගැලවීගත හැකි වුවත් කළු කුහරයක් තුළට වන් යම් දෙයක් වේද එය භෞතික අභ්‍යවකාශයෙන් න්‍යායාත්මකව අතුරුදන්ය.

මේ අදහස නූතන භෞතික විද්‍යාවේ මූලික පූර්වාවයක් හෙවත් තර්ක පදනමකි. කළු කුහරයේ සිද්ධි ක්ෂිතිජයට (event horizon) යමක් වැටුණු ආපසු සොයා ගැනීමක් කළ නොහැක. එහි අනාගතය පුරෝකතනය කළ නොහැකිය. කළු කුහරයක් තුලට ගමන් කරන කිසිම නිරීක්ෂකයෙකුට පැවතිය නොහැක. ඔව්,  ශූනත්වයට පත් වීමට පෙර වටපිට බලා ඇතැම් දේ දැක බලා ගැනීමට තරම් ප්‍රමාණවත් කාලයක්වත් පැවතිය නොහැක.

පෘතුගාලය,කැනඩාව, නෙදර්ලන්තය, ඇමෙරිකා එක්සත් ජනපදය යන රටවල් හරහා විසිරී සිටින ගණිතඥයන් හා භෞතිකඥයන් කණ්ඩායමක් මේ උපන්‍යාසය බිඳ දැමීමට දැන් උත්සාහයක යෙදී සිටිති. එම උත්සාහය සමහරවිට ඇල්පෙනෙත්තකින් (උපන්‍යාසයෙහි) හිලක් විදිනවා මෙන් සුළු විය හැකිය. එහෙත් එය දැනටමත් ඔවුන්ගේ සගයන් අතර මේ වෑයම ගැන දැඩි උනන්දුවක් දැල්වීමටත්   මෙන්ම පර්යේෂණ කිහිපයකටත්  මග පාදා ඇත.

Physical Review නම් සඟරාවට ජනවාරි මැද  ලිපියක් සපයන මේ කණ්ඩායමේ පර්යේෂකයන් පෙන්වාදෙන්නේ ඇතැම් සීමාන්තික අවස්ථාවල කාල්පනික නිරීක්ෂණයන්ට ක්ෂණිකව නෂ්ටප්‍රාප්ත වීමට සිදු නොවී සිය සිද්ධි සිතිජය පසු කිරීමට ඉඩ ප්‍රස්ථා සපයන  කළු කුහර පැවතිය හැකි බවය. මෙකී ඒකත්වයන්ගෙන් (singularities) එකක සිද්ධි සිතිජය වෙත ඔබේ හොඳින් ආරක්ෂක්ෂිත  අභ්‍යවකාශ යානය අමාරුවෙන් ඉදිරියට ගනිද්දී ඔබට අභ්‍යන්තරයේ සිදුවන්නේ කුමක්දැයි දැකබලා ගැනීමට හැකිවනු අයුරු (ඉතා සුළු වුවත්) ප්‍රමාණවත් කාලයක් ජීවත් වීමට පුළුවන. (ඒකත්වයන් යනු, ඒවායේ පදාර්ථ සහ ශක්තිය සමග සියල්ල කළු කුහර සැඟවී යන අපිරිමිත ලෙස කුඩා වූ ස්ථානය).   එය ඉතාමත් සුළු වූවත් කළු කුහරය ජය ගැන්මක් ලෙස සැලකිය හැකියි. භෞතික විද්‍යාඥයන් මේ කාරණාව මෙතරම් බරපතළ ලෙස ප්‍රබල ලෙස සලකන්නේ  මන්දැයි තේරුම් ගැනීමට නම් ඔවුන් විශ්වය ගැන කෙලෙස හිතන්නේ දැයි දැනගත යුතුය.

දශක ගණනාවක් තිස්සේ පර්යේෂකයන් විශ්වාස කළේ කළු කුහරයක් තුලට එබී බැලීමට නිරීක්ෂකයකුට අවස්ථාවක්,  ක්‍රමයක් නොමැති බවයි. ඒ කියන්නේ ක්ෂණිකව කලුකුහරයේ ගොදුරු බවට පත්ව ගිල දැමීමකින් තොරව කළු කුහරවල අභ්‍යන්තරය අවශ්‍යයෙන්ම නිරීක්ෂණය කළ නොහැක්කකි යනනය. මේ  මතිය (notion) හඳුන්වනු ලබන්නේ අන්තරීක්ෂනවාරණ උපන්‍යාසය(cosmic censorship hypothesis) යනුවෙනි. එය මුලින්ම ඉදිරිපත් කළේ ගණිතඥ රොජර්ලෙක්රෝද් විසිනි.  ඒ 1969 දී ය. පසුව ස්ටීවන් හෝකින්ස්, කිප් තෝන් වැනි අයගේ වාද විවාද වලට ලක්ව දශක ගණනාවක් කාලය තුළ සංශෝධනයට ලක් වුවද කිසි දිනක එය සිද්ධාන්තයක් ලෙස නිල වශයෙන් ප්‍රකාශයට කර නැත. එසේ වුවද ඇතැම් පර්යේෂකයන්ට නම්  එය දැඩිව අදහන ධර්මයක  කොටසක් වැනිය. විශ්වය පිළිබඳව නූතන මොඩලවල ඇතැම් ව්‍යාකූල තැන් මනාව නිරවුල් කිරීමට ලැබෙන රුකුල මේ මතය තහවුරු කර ගැනීමට ඔවුනට ආධාර වේ.

එහෙත් නව පර්යේෂණ වාර්තාව හඟවන්නේ මෙකී විශේෂ කළු කුහර වල සීමා  ප්‍රදේශයන්හී අන්තරීක්ෂණවාරණය බිඳ වැටෙන බවයි. භෞතික විද්‍යාව මගින් පුරෝකථනය කළ හැකි කලාපයට ඔබ්බෙන් නිරීක්ෂකයකුට ගමන් කළ හැකි අතර එහිදී සිදුවන දෑ නිරීක්ෂණය කළ හැකිය. ඉතින් එය සත්‍යයක් නම් ඉන් හැඟී යන්නේ, අපට අර්ථවත් වන භෞතික විද්‍යා ලෝකය අර්ථාවබෝධයෙන් තොර ලෝකයක් කරා ඇදී යන බවකි.

ඒකත්වයන් තුළ සිදුවන්නේ කුමක්දැයි තේරුම් ගැනීමට නූතන භෞතික විද්‍යාව සමත්ව නැත. එම දැනුම අවකාශ-කාල ව්‍යුහය මගින් වළකනු ලැබ ඇත. දැනට දැන සිටින සියලුම ඒකත්වයන් එක්කෝ කළු කුහරවල විනිවිද යා නොහැකි සිද්ධීන් සිතිජයට ඔබ්බෙන් අගුළුලා   පැත්තකට දමා ඇත. නැතිනම් මහා පිපුරුමේ මුල් මොහොතෙහි අනවබෝධ ඉතිහාසය තුළ හිරවී ඇත.

ජනවාරි 17 දා පළ වූ වාර්තාව මේ මතවාදය බිඳ දමන ඇල්පෙනෙති සිදුරක් නම් එය අන්තරීක්ෂවාරණය යන පූර්ණ අදහස බිඳී යන තුරු පුළුල් විය හැකි සිදුරක් බවට පරිවර්තනය වීමේ තර්ජනය ඇත. බර්ක්ලෙහි කැලිෆෝනියා විශ්ව විද්‍යාලයේ ගණිතඥයෙකු වන  පීටර් හින්ට්ස් සහ සගයන් පෙන්වා දී ඇත්තේ ඇතැම් තත්ත්වයන් යටතේ කළුකුහරය වටා ඇති පවුරු බිඳ දැමිය හැකි බවයි. භෞතිකඥයන් ලෝකය දකින අන්දමට මෙය කෙතරම් පටහැනි ද කිවහොත් වාර්තාව පළ වූ සැණින් ම පාහේ ප්‍රතිචාර ලැබෙමින් පවතී. හින්ට්ස් කියා සිටින්නේ විශ්වය පිළිබඳව තමන්ගේ සහ සගයන්ගේ මොඩලය ‘ඇදහිය නොහැකි’ මට්ටමේ එකක් බව අවබෝධ කරගැනීම වැදගත් බවයි. “ඒත් මේ ආකාර වියුක්ත පර්යේෂණ තමයි යථාර්ථය පිළිබඳ පුළුල් ලෙස පිළිගැනීමට ලක්වූ මත  ඉරා දමා නව විමර්ශනයන්ට මග පාදන්නේ” යයි හින්ට්ස්  වැඩිදුරටත් කියා සිටී.

 

Live Science හි පළවූ  The Wall of Death Around Black Holes Could Break Down යන ලිපිය ඇසුරෙනි

2 Responses to “කළු කුහර වටා තිබෙන මරණයේ පවුරු බිඳ දැමිය හැකියි”

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න /  වෙනස් කරන්න )

Google photo

ඔබ අදහස් දක්වන්නේ ඔබේ Google ගිණුම හරහා ය. පිට වන්න /  වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න /  වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න /  වෙනස් කරන්න )

Basic HTML is allowed. Your email address will not be published.

Subscribe to this comment feed via RSS

This site uses Akismet to reduce spam. Learn how your comment data is processed.

%d bloggers like this: