අපි‍්‍රකාවෙන් පිටත පැරණිතම මානව ෆොසිලය ඊශ‍්‍රායලයෙන් හමුවේ

Posted by

පසුගිය වසර කිහිපය තුළ අලූතෙන් හමු වූ ෆොසිල, අප මනුෂ්‍යයන් බවට පත්වූ පරිණාමීය මඟ යළි විමසා බැලීමට මානව විද්‍යාඥයන්ට බලකරයි. මෙතෙක් අපි‍්‍රකානු මහාද්වීපයෙන් පිටත හමු වූ පැරණිතම නූතන මානව ෆොසිලය හේතුවෙන් අපේ ආදිතමයන් අපි‍්‍රකාවෙන් පිටත ගිය දිනය තවත් ආපස්සට යැවීමට මඟපෑදී තිබේ. ඉහළ වම් හනු අස්ථියේ දත් බොහොමයක්ද සහිත මේ ෆොසිලය හමුවී ඇත්තේ ඊශ‍්‍රායලයේ මිස්ලියා ලෙන තුළිනි. එය මෙයට වසර 177,000 සිට 194,000 දක්වා පැරණි යයි ගණන් බලා තිබේ. මෙය අපි‍්‍රකාවෙන් පිටත මෙතෙක් කිසිදාක සොයා ගනු ලැබූ අප අයත් මිනිස් විශේෂය වන Homo sapiens විශේෂයේ වෙනත්  ඕනෑම අවශේෂයකට වඩා බෙහෙවින් පැරණිය. එමෙන්ම මෑතක සිදුකෙරුණු අධ්‍යයනය ගණනාවක සොයා ගැනීම් හා සමපාත වේ. මේ සියල්ල අප පොළඹවන්නේ අපේ විශේෂයේ, පරිණාමීය සම්භවයන් සහ පුරාණ ලෝකය පුරා සංක‍්‍රමණ ගැන අපේ අදහස් යළි සලකා බැලීමටයි.

මිස්ලියා ලෙන

අපි‍්‍රකානු සම්භවය සහ එතැන් සිට ව්‍යාප්තිය :

මානව විද්‍යාඥයන් විසින් හොමිනින්(hominins) යනුවෙන් හඳුන්වනු ලබන අදිතම මානවයන් ජීවත්වන්නේ මෙයට වසර මිලියන 6-7 කට පෙර පමණ අපි‍්‍රකාවෙහිය. මේ මුල්කාලීන පරිණාමීය පූර්වජයන් (evolutionary ancestors) මානව පවුලට අයත් යයි හඳුනා ගනු ලබන්නේ ප‍්‍රධාන වශයෙන්ම දෙපාවත්බව (bipedalism) පිළිබඳ පැහැදිලි ලක්ෂණ ඔවුන්ගේ අස්ථි මගින්  පෙන්නුම් කරනු ලැබීම නිසාවෙනි:ඔවුන් ඇවිද්දේ දෙපයිනි. මානව පූර්වජයන් අපි‍්‍රකාවෙන් බැහැරව සංක‍්‍රමණය වී පුරාණ ලෝකය පුරාවට ව්‍යාප්ත වූයේ වසර මිලියන දෙකකට පමණ ඉහත දී ය.

මෑතක් වනතුරුම මානව විද්‍යාඥයන් පොදුවේ පිළිගත්තේ, Homo sapiens මුලින්ම බිහිවුනේ මෙයට වසර 200,000 පමණ පෙර අපි‍්‍රකාවේ දී යනුවෙනි. මේ මතය පදනම් වූයේ ජානමය අධ්‍යයනවල සොයා ගැනීම් හා ෆොසිල මතය. ඉතියෝපියාවේ ස්ථාන දෙකකින් එනම් හර්ටෝ(Herto) සහ ඔමෝ කිබිෂ්(Omo Kibish) යන ස්ථානවලින් ආදි Homo sapiens ෆොසිල සොයා ගනු ලැබ ඇත. ඒවායේ කාල නිර්ණය අනුව වසර 160,000  සිට 195,000 දක්වා පැරණිය. එහෙත් 2017 ජූනයේ දී මොරොක්කෝවේ ජෙබෙල් ඉර්හවුඞ්(Jebel Irhoud) නම් ස්ථානයෙන් සොයා ගනු ලැබූ ෆොසිල පර්යේෂකයන් විසින් දින නියම කරනු ලැබ ඇත්තේ වසර 315,000 පමණ පෙර ලෙසටය. එමෙන්ම ඒවා Homo sapiens පරිණාමයේ මුල් අදියරයකට අයත් විය හැකියැයිද පර්යේෂකයෝ අදහස් කරති. මෙම අනපේක්ෂිත ලෙස ආපස්සට යාම හේතුවෙන් අපේ විශේෂයන් සම්භවය ද අවුරුදු 100,000කින් පමණ ආපස්සට යැවේ. මෑතක වනතුරුම අපි‍්‍රකාවෙන් පිටත සොයා ගනු ලැබූ පැරණිතම මිනිස්  ෆොසිලවල වයස අවුරුදු 90,000 සිට 120,000 දක්වා වේ. අපි‍්‍රකා මහද්වීපයෙන් පිටව සිය සංක‍්‍රමණය ආරම්භ කරන තුරු මෙයට වසර 200,000 ක් පමණ දක්වාම මානවයන් අපි‍්‍රකාවට සීමා වී තිබුණ බවයි සැලකුණේ. එහෙත්, මෑතක ජාත්‍යන්තර පර්යේෂණ කණ්ඩායමක්, ඊශ‍්‍රායලයේ මිස්ලියා ලෙනෙහි තිබී මුල් නූතන මිනිස් ෆොසිල සොයා ගැනීමක් වාර්තා කර ඇත. ඒවා වසර 177,000 සිට 194,000 දක්වා පැරණි යයි සැලකේ. මේ දිනය, අපේ විශේෂය අපි‍්‍රකාවෙන් මහා නික්මයාමේ වකවානුව වසර 50,000 වඩා වැඩි ප්‍රමාණයකින් ආපස්සට තල්ලූ කරයි.

පුරාණ අවශේෂ ඉහල තාක්ෂණය යොදා ගනිමින් විශ්ලේෂණය කිරීම

මිස්ලියා ෆොසිලය යම් එක් පුද්ගලයෙකුගේ හණුවේ කොටසක් පමණකි. මේ සොයා ගැනීමේ වටිනාකම අවබෝධ කරගැනීමට නම් එම තැනැත්තා ජීවත් වූයේ කුමන කාලවකවානුවේදී ද එම තැනැත්තා කුමන විශේෂයකට අයත් වී ද යන්න ගැන සැක හැර දැන ගත යුතුය. අප මුලින් ම ෆොසිලය හා සම්බන්ධ ගල් ආයුධ සලකා බැලූවොත් ඒවා මුල් මධ්‍ය පුරාශීලා නම් වර්ගයට අයත් ඒවාය(Early Middle Paleolithic). එම ආයුධවලට සෑහෙන පෞරාණික බවක් ඉන් ගම්‍ය වේ. මැද පෙරදිග වෙනත් ස්ථානවලින් සොයාගත් සමාන ආයුධ සාමාන්‍යයෙන් දින නියම වන්නේ වසර 160,000 කට වඩා පැරණි කාලයකටය. විවිධ ශිල්ප ක‍්‍රම යොදාගෙන හනුවේ කාලය නිර්ණය කිරීමට කි‍්‍රයා කිරීමෙන් එය වසර 177,000ක් 194,000ක් අතර කාලයකැයි නිගමනය විය. ෆොසිලය පිළිබඳව සාම්ප‍්‍රදායික සහ මානව විද්‍යාත්මක මෙන්ම නවීනතම තාක්ෂණික ශිල්ප ක‍්‍රමද යොදා සිදු කළ විශ්ලේෂණයන් හි දී පැහැදිලිව පෙනී ගියේ මිස්ලියා ෆොසිලය අපේ විශේෂයට අයත් සාමාජිකයෙකුගේ එකක් බවයි.

මිස්ලියාවල සොයා ගැනීම් මෑතක සිදුකෙරුණු ප‍්‍රවේණි විද්‍යා අධ්‍යයනයන් හා සම්බන්ධ වේ. නියැන්ඩර්තාල් ජාන රාශියට(Neanderthal gene pool) අපි‍්‍රකාවෙන් ජානමය ද්‍රව්‍ය ගලා ඒම පිළිබඳව විසිතුරු සාක්සි එමගින් සැපයේ. මොරොක්කෝ ජෙබෙල් ඉර්හවුඞ්  ආදිතම Homo sapiens ෆොසිල සඳහා සැපයුණු වඩාත් පැරණි දින වකවානු  නූතන මිනිසා ඒ කාලය වන විටත් අපි‍්‍රකාවේ සිටි බව පෙන්නුම් කරයි.  මේ ජානමය ප‍්‍රතිඵල හඟවන්නේ නූතන මිනිසා අපි‍්‍රකාවෙන් පිටතට සංක‍්‍රමණය වීම වඩාත් ආදි කාලයකදී අඩුතරමින් වසර 220,000 කටත් පෙර සිදුවන්න ඉඩ තිබූ බවයි. මිස්ලියා ෆොසිල මෙයට වඩා කාලයෙන් අඩුවුව ද කලින් විශ්වාස කළාට වඩා සැලකිය යුතු කාලයකට පෙර නූතන මිනිසා අපි‍්‍රකාවෙන් බැහැර ගිය බවට මුල්ම ෆොසිල සාක්ෂි සපයයි. මෙලෙස මෑතක අධ්‍යයන මාලාවකගෙන් මෙන්ම  විෂම මූලයන්ගෙන් සිදුකෙරුණු සොයා ගැනීම් මිනිසුන් වන අපගේම සම්භවය හා ලෝකය පුරා ව්‍යාප්තිය පිළිබඳ නව ඇතුලු නුවනක් සපයයි.

 

THE CONVERSATION(Australia)හි පළවූ Fossil jawbone from Israel is the oldest modern human found outside Africa යන ලිපිය ඇසුරෙනි.

 

 

 

 

එක් ප්‍රතිචාරයක්

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න /  වෙනස් කරන්න )

Google photo

ඔබ අදහස් දක්වන්නේ ඔබේ Google ගිණුම හරහා ය. පිට වන්න /  වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න /  වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න /  වෙනස් කරන්න )

This site uses Akismet to reduce spam. Learn how your comment data is processed.