නව ඇස්තමේන්තුවකට අනුව, ගොඩබිම් මූලාශ්ර මගින් වාර්ෂිකව ක්ෂුද්ර ප්ලාස්ටික් කැබලි කොවොඩ්රිලියන (Quadrillion) 600ක් වායුගෝලයට මුදා හරින බව පෙනී යයි.
ක්ෂුද්ර ප්ලාස්ටික් යනු සහරා කාන්තාරයේ සිට ආක්ටික් මුහුදු අයිස් තට්ටු දක්වා පෘථිවියේ සෑම තැනකම දක්නට ලැබෙන දෙයකි. මෙම ප්ලාස්ටික් අංශු සෑම තැනම තිබුණද, අපගේ වායුගෝලයේ ඒවා හරියටම කොපමණ ප්රමාණයක් තිබේද යන්න තීරණය කිරීමට විද්යාඥයින් මෙතෙක් දැඩි උත්සාහයක නිරත විය.
දැන්, ‘Nature’ සඟරාවේ පළ වූ නව ඇස්තමේන්තුවකට අනුව, ගොඩබිම් මූලාශ්ර මගින් වාර්ෂිකව ක්ෂුද්ර ප්ලාස්ටික් අංශු කොවොඩ්රිලියන 600ක් (600,000,000,000,000,000) වායුගෝලයට මුදා හරින බව පෙනී යයි. මෙය සාගර මගින් මුදා හරින අංශු ප්රමාණයට (කොවොඩ්රිලියන 26ක් පමණ) වඩා 20 ගුණයකටත් වඩා වැඩි ප්රමාණයකි.
මෙම අධ්යයනයට අනුව, වාතයේ පවතින ක්ෂුද්ර ප්ලාස්ටික්වල මධ්යස්ථ සාන්ද්රණය ගොඩබිමට ඉහළින් ඝන මීටරයකට (m3) අංශු 0.08ක් වන අතර මුහුදට ඉහළින් ඝන මීටරයකට අංශු 0.003ක් වේ.
මෙම ඇස්තමේන්තු, වායුගෝලීය ක්ෂුද්ර ප්ලාස්ටික් පිළිබඳ පෙර ගණනය කිරීම්වලට වඩා 100 ත් 10,000 ත් අතර වාරයක් අඩු අගයකි. මෙම පරස්පරතාව මගින් පෙන්නුම් කරන්නේ මෙම දූෂක සම්බන්ධයෙන් වඩා හොඳ ගෝලීය මිනුම් ක්රමවේදයක අවශ්යතාවය බව පර්යේෂකයෝ පෙන්වා දෙති.
“පවතින විමෝචන ඇස්තමේන්තුවල අවිනිශ්චිතතාවයන් ඉතා විශාල බව අපි දැන සිටියා,” යැයි වියානා විශ්ව විද්යාලයේ වායුගෝලීය විද්යාඥයෙකු සහ මෙම අධ්යයනයේ ජ්යෙෂ්ඨ කතුවරයා වන ඇන්ඩ්රියාස් ස්ටෝල් පවසයි. “අපගේ අධ්යයනයෙන් පසුවත් ඒවා තවමත් විශාලයි, නමුත් අවම වශයෙන් ගොඩබිම් සහ සාගර විමෝචනවල වැදගත්කම සම්බන්ධයෙන් ඇති අවිනිශ්චිත පරාසය පටු කිරීමට අපට හැකි වුණා.”
ක්ෂුද්ර ප්ලාස්ටික් යනු මොනවාද?
ක්ෂුද්ර ප්ලාස්ටික් යනු මයික්රෝනයක (Micron) සිට මිලිමීටර් පහක් දක්වා වූ ඕනෑම ප්ලාස්ටික් අංශුවකි. සුළඟින් පහසුවෙන් ගසාගෙන යන සහ ජලය මගින් දිගු දුරක් ගෙන යන මෙම කුඩා අංශු හඳුනා ගැනීම අතිශයින් දුෂ්කර වන අතර පරිසරයෙන් ඉවත් කිරීම පාහේ කළ නොහැක්කකි.
පෙර ඇස්තමේන්තු අවධානය යොමු කර තිබුණේ මිනිස් ක්රියාකාරකම් මගින් ජනනය වන ක්ෂුද්ර ප්ලාස්ටික් ගණනය කිරීම හෝ යම් ප්රදේශයක වාතයේ ඇති ඒවායේ සාන්ද්රණය සෘජුවම මැනීම කෙරෙහි ය. නමුත් මෙම මිනුම් ස්ථානයෙන් ස්ථානයට බෙහෙවින් වෙනස් වේ. උදාහරණයක් ලෙස, චීනයේ ගිනිකොනදිග වෙරළ තීරයේ වායුගෝලීය ක්ෂුද්ර ප්ලාස්ටික් ඇස්තමේන්තු ඝන මීටරයකට අංශු 0.004 සිට 190 දක්වා විහිදී ඇත. වඩාත් ගෝලීය ඇස්තමේන්තුවක් ලබා ගැනීම සඳහා, ස්ටෝල් සහ ඔහුගේ කණ්ඩායම ලොව පුරා ස්ථාන 283 කින් එකතු කරන ලද මිනුම් 2,782 ක් සම්පාදනය කළහ.
මෙම සොයාගැනීම් ගෝලීය ක්ෂුද්ර ප්ලාස්ටික් මට්ටම් පිළිබඳ අනාගත අධ්යයනයන් සඳහා පදනමක් වනු ඇතැයි පර්යේෂකයෝ බලාපොරොත්තු වෙති.
New Scientist Magazine ආශ්රයෙනි.
තතු 
ප්රතිචාරයක් ලබාදෙන්න