මතුපිටින් පෙනෙන තාක්ෂණික ලෝකයට එහා ගිය, 2026 වසරේ ලෝකය උඩුයටිකුරු කිරීමට නියමිත ප්රධාන තාක්ෂණික ප්රවණතා හතක් පිළිබඳව ‘Nature’ සඟරාව විසින් සකස් කරන ලද වාර්තාවක් ඇසුරින් මෙම ලිපිය සකස් කර ඇත.
2026 වසරේ ලෝකය වෙනස් කරන තාක්ෂණික විප්ලවයන්
පරිගණක තාක්ෂණයේ සිට වෛද්ය විද්යාව දක්වා විහිදී ගිය මෙම නවෝත්පාදනයන් මානව වර්ගයාගේ අනාගතය තීරණය කරන ප්රධාන සාධක වනු ඇත.
- සත්ව ඉන්ද්රියයන් මිනිස් සිරුරට බද්ධ කිරීම (Xenotransplantation)
මිනිස් ඉන්ද්රියයන් හිඟකම නිසා දිනකට ලොව පුරා බොහෝ පිරිසක් මියයති. මීට විසඳුමක් ලෙස ජානමය වශයෙන් වෙනස් කරන ලද ඌරන්ගේ වකුගඩු සහ හදවත් මිනිසුන්ට බද්ධ කිරීමේ පර්යේෂණ සාර්ථක වෙමින් පවතී. 2024 දී පළමු වරට ජාන 69ක් වෙනස් කරන ලද ඌරු වකුගඩුවක් සාර්ථකව මිනිසෙකුට බද්ධ කරන ලදී. - කෘතිම බුද්ධියෙන් (AI) කාලගුණ අනාවැකි පළ කිරීම
සාම්ප්රදායික ක්රමවලට වඩා 10,000 ගුණයක වේගයකින් කාලගුණ අනාවැකි පළ කළ හැකි AI ආකෘති දැන් නිර්මාණය වී ඇත. ‘Pangu-Weather’ සහ ‘Aardvark’ වැනි මාදිලි හරහා සුළි කුණාටු ඇතිවන ආකාරය දින ගණනාවකට පෙර නිවැරදිව ප්රකාශ කිරීමට විද්යාඥයින්ට හැකි වී තිබේ. - මීළඟ පරම්පරාවේ න්යෂ්ටික බලශක්තිය
AI තාක්ෂණයේ දියුණුවත් සමඟ විදුලි බල ඉල්ලුම සීඝ්රයෙන් ඉහළ යමින් පවතී. මීට විසඳුමක් ලෙස කුඩා ප්රමාණයේ මොඩියුලර් ප්රතික්රියාකාරක (Small Modular Reactors – SMRs) ලොව පුරා ජනප්රිය වෙමින් පවතින අතර, රුසියාව සහ චීනය දැනටමත් මේවා ක්රියාත්මක කර ඇත. මීට අමතරව, ‘ෆියුෂන්’ (Fusion) බලශක්තිය ද වාණිජ මට්ටමට ගෙන ඒමට පර්යේෂණ සිදු කෙරේ. - මොළයේ ක්රියාකාරිත්වය සිතියම්ගත කිරීම (Brain Mapping)
ඉලෙක්ට්රෝන අන්වීක්ෂ භාවිතයෙන් මොළයේ ස්නායු සම්බන්ධතා ඉතා පැහැදිලිව සිතියම්ගත කිරීමට නව තාක්ෂණයන් බිහි වී ඇත. ‘LICONN’ වැනි ක්රමවේද හරහා ස්නායු සෛලවල ව්යුහය සහ ඒවායේ ක්රියාකාරිත්වය වෙන වෙනම හඳුනා ගැනීමට විද්යාඥයින්ට දැන් හැකියාව ලැබී තිබේ. - විශ්වයේ සහ සාගරයේ අන්තයන් ගවේෂණය කිරීම
චිලී රාජ්යයේ පිහිටි ‘Vera C. Rubin’ නිරීක්ෂණාගාරය මගින් ඉදිරි වසර 10 තුළ දකුණු අහසේ ඇති මන්දාකිනි බිලියන 20ක් පමණ නිරීක්ෂණය කිරීමට නියමිතය. ඒ අතරම, චීනයේ ‘Fendouzhe’ වැනි සබ්මැරීන හරහා සාගරයේ කිලෝමීටර් 10කට වඩා ගැඹුරු ප්රදේශවල ජීවත් වන අමුතු ජීවීන් පිළිබඳව පර්යේෂණ සිදු කෙරේ. - mRNA චිකිත්සාව (mRNA Therapeutics)
කොවිඩ් මර්දන එන්නත් හරහා කරළියට පැමිණි mRNA තාක්ෂණය දැන් පිළිකා මර්දනය සඳහා ද යොදා ගනී. අග්න්යාශයික පිළිකා වැනි රෝගීන්ගේ ජීවිත කාලය දීර්ඝ කිරීමට මෙම එන්නත් සමත් වී ඇති අතර, ස්වයං ප්රතිශක්තිකරණ රෝග සඳහා ද මෙය අත්හදා බලමින් පවතී. - ක්වොන්ටම් පරිගණක (Quantum Computing)
සාමාන්ය පරිගණකවලට වඩා බිලියන ගුණයක වේගයකින් යුත් ක්වොන්ටම් පරිගණකවල ඇති ප්රධාන ගැටලුවක් වූ ‘දෝෂ නිවැරදි කිරීම’ (Error-correction) සඳහා ගූගල් සහ හාවඩ් විශ්වවිද්යාලයේ විද්යාඥයින් සාර්ථක විසඳුම් සොයාගෙන ඇත. ඉදිරි වසර කිහිපය තුළ ප්රායෝගිකව භාවිත කළ හැකි ක්වොන්ටම් පරිගණක පද්ධති බිහි වනු ඇතැයි අපේක්ෂා කෙරේ.
තතු 
ප්රතිචාරයක් ලබාදෙන්න