බ්‍රිතාන්‍යයේ ගාඩියන් පුවත්පත වාර්තා කරයි.

එක්සත් ජනපදය සහ ඊශ්‍රායලය ඉරානයට එරෙහිව කරන යුද්ධය “ඉතා ඉක්මනින්” අවසන් විය හැකි බවට ඩොනල්ඩ් ට්‍රම්ප් ඉඟි කිරීමත් සමඟ, පසුගිය සඳුදා වාර්තා වූ සිව් වසරක උපරිම මිල ගණන්වල සිට බොරතෙල් මිල නැවතත් පහත වැටී ඇත.

ගෝලීය වෙළඳපොළ තුළ මෙය අතිවිශේෂ පැය 24ක කාලයක් විය.

ඊයේ මේ වන විට, ජාත්‍යන්තර මිණුම්දණ්ඩ වන බ්‍රෙන්ට් (Brent) බොරතෙල් මිල, 2022 රුසියානු යුක්රේන ආක්‍රමණයෙන් පසු ප්‍රථම වතාවට බැරලයක් ඩොලර් 100 සීමාව ඉක්මවා ගියේය. මෙය ප්‍රමුඛ පෙළේ ආසියානු සහ යුරෝපීය කොටස් වෙළඳපොළ දර්ශකවල දැඩි කඩා වැටීමකට හේතු විය. නිව්යෝර්ක් හි වෝල් ස්ට්‍රීට් (Wall Street) වෙළඳපොළ ද දිනය ආරම්භ කළේ දැඩි පීඩනයක් යටතේය.

අනතුරුව, වෙළඳපොළ වෙනස්වීම් පිළිබඳව දැඩි අවධානයෙන් පසුවන ට්‍රම්ප් සිය අදහස් ප්‍රකාශ කිරීම ආරම්භ කළේය. ඉරානයට එරෙහි යුද්ධය “සම්පූර්ණයෙන්ම වගේ අවසන්” යැයි එක්සත් ජනපද ජනාධිපතිවරයා CBS පුවත් සේවය සමඟ පැවැත්වූ සම්මුඛ සාකච්ඡාවකදී ප්‍රකාශ කළේය.

සඳුදා දින බැරලයක් ඩොලර් 119.50ක් දක්වා ඉහළ ගිය බ්‍රෙන්ට් බොරතෙල් මිල, පසුව ශීඝ්‍රයෙන් පහත වැටී ඩොලර් 98.96ක් ලෙස ස්ථාවර විය. වෝල් ස්ට්‍රීට් හි S&P 500 දර්ශකය ද පාඩු ලබමින් තිබූ තත්ත්වයෙන් මිදී දිනය අවසානයේ ඉහළ අගයක් වාර්තා කිරීමට සමත් විය.