දක්ෂ පක්ෂි නිරීක්ෂකයෙකු වීම ඔබේ සංජානන සෞඛ්යය (Cognitive Health) ඉහළ නැංවීමට හේතු විය හැක.
පක්ෂි නිරීක්ෂකයෙකු ලෙස ඔබ වර්ධනය කරගන්නා කුසලතා, ඔබේ මොළයේ ක්රියාකාරිත්වය ඉහළ නැංවීම සඳහා මැනවින් ගැළපෙන බව කැනඩාවේ ටොරොන්ටෝ හි ‘බේක්රෙස්ට්’ (Baycrest) රෝහලේ විද්යාඥ පිරිසක් පවසති.
ඔවුන්ගේ නවතම අධ්යයනයෙන් හෙළි වී ඇත්තේ, වසර ගණනාවක් තිස්සේ දුරදක්න (Binoculars) ආධාරයෙන් කුරුල්ලන් නිරීක්ෂණය කිරීම හරහා වර්ධනය වන තීක්ෂණ ඇස, දීර්ඝ වේලාවක් අවධානය යොමු කිරීමේ හැකියාව සහ ශක්තිමත් මතකය වැනි කුසලතා මොළයේ ව්යුහය පවා වෙනස් කිරීමට සමත් වන බවයි. මෙලෙස මොළය ප්රතිසංවිධානය වීම (Reorganise) හරහා පුද්ගලයෙකුගේ සංජානන හැකියාවන් දියුණු වේ.
The Journal of Neuroscience සඟරාවේ පළ වූ මෙම පර්යේෂණය සඳහා ප්රවීණ පක්ෂි නිරීක්ෂකයන් 29 දෙනෙකු සහ ආධුනිකයන් 29 දෙනෙකු සහභාගී කරවා ගන්නා ලදී. මෙම කණ්ඩායම් දෙකම එකම වයස් මට්ටම්වල පසුවූ අතර ස්ත්රී පුරුෂ භාවය ද සමානව පවත්වා ගන්නා ලදී.
මොළයේ ස්කෑන් (Scan) පරීක්ෂණ මගින් හෙළි වූයේ ප්රවීණ පක්ෂි නිරීක්ෂකයන්ගේ අවධානය සහ ප්රත්යක්ෂය (Attention and Perception) හා සම්බන්ධ මොළයේ කොටස් වඩාත් සංකීර්ණ ලෙස සැකසී ඇති බවයි. විශේෂයෙන්ම, මෙම මොළයේ කලාපවල ඇති ජල අණු වඩාත් නිදහසේ චලනය වීමට හැකි වීම නිසා ඔවුන්ට ඉතා ඉක්මනින් කුරුල්ලන් හඳුනා ගැනීමට හැකි වී තිබේ.
අලුත් භාෂාවක් ඉගෙනීම වැනි ඕනෑම කුසලතාවක් මොළයට හිතකර වුවද, පක්ෂි නිරීක්ෂණයේ ඇති සංකීර්ණත්වය නිසා එය මොළයට වඩාත් සුවිශේෂී ප්රතිලාභ ලබා දෙන බව පර්යේෂකයෝ තර්ක කරති.
ඇමරිකාවේ පෙන් ස්ටේට් (Penn State) විශ්වවිද්යාලයේ නිරෝගී වයස්ගත වීම පිළිබඳ මධ්යස්ථානයේ අධ්යක්ෂ මහාචාර්ය මාටින් ස්ලිවින්ස්කි පවසන්නේ, “පක්ෂි නිරීක්ෂණයේදී ඔබේ අවධානය සහ මතකය නිරන්තරයෙන් අවදියෙන් තැබිය යුතුයි. මෙහිදී ඔබට කිසිවිටෙකත් ‘ස්වයංක්රීයව’ (Autopilot) ක්රියා කළ නොහැකියි,” යනුවෙනි.
පරිසරය සහ කුරුල්ලන් ලබා දෙන සංඥා නිරන්තරයෙන් වෙනස් වන බැවින්, ප්රවීණයෙකුට වුවද මෙය සැමවිටම අභියෝගාත්මක කාර්යයකි. මෙවැනි අභියෝගාත්මක ක්රියාකාරකම් මොළයට ලැබෙන ව්යායාමයක් හා සමාන වේ.
මෙම කුසලතා වර්ධනය කරගැනීම සහ එමගින් මොළයේ සිදුවන ව්යුහාත්මක වෙනස්කම් නිසා මහලු වියේදී පවා මතකය සහ තොරතුරු ග්රහණය කරගැනීමේ හැකියාව ඉහළ මට්ටමක පවත්වා ගත හැකි බව පර්යේෂකයන්ගේ නිගමනයයි.
බීබීසී සයන්ස් ෆෝකස් සඟරාවෙන්
තතු 
ප්රතිචාරයක් ලබාදෙන්න